Y rôl

Ydych chi'n angerddol am y Gymraeg? Oes gennych chi sgiliau iaith da a chreadigol? Ydych chi'n mwynhau helpu eraill gyda'u hanghenion o ran y Gymraeg? Rydyn ni'n chwilio am Gyfieithydd i ymuno â Cyfoeth Naturiol Cymru (CNC) yn ein Tîm Cyfieithu prysur.

Gan adrodd i Arweinydd y Tîm Cyfieithu, byddwch yn ymuno â thîm bach o gyfieithwyr ac yn cyfrannu at waith CNC o ran ymgysylltu â'r cyhoedd a rhanddeiliaid gyda Chymraeg clir, cywir a chreadigol mewn modd amserol ac i safon uchel.

Yr hyn y byddwch chi’n ei wneud

• Cyfieithu a phrawfddarllen amrywiaeth eang o ddogfennau i safon uchel i ddiwallu gofynion ein polisi iaith Gymraeg a'n harddull ysgrifennu mewnol.
• Cysylltu â chyfieithwyr allanol i gaffael cyfieithiadau yn ôl y galw. Sicrhau ansawdd digonol y gwasanaeth allanol, gan fonitro ar gyfer cysondeb a glynu at arddull mewnol.
• Blaenoriaethu gwaith yn effeithiol er mwyn rheoli llwyth gwaith, ceisiadau niferus a dyddiadau cau heriol.
• Cyfathrebu'n effeithiol â chwsmeriaid i ddarparu lefelau uchel o wasanaeth a rheoli disgwyliadau yn effeithiol.
• Arddangos sylw rhagorol i fanylion er mwyn cynnal safonau proffesiynol.
• Cynnal system cadw cofnodion effeithlon er mwyn olrhain y galw a'r costau.
• Ymgymryd â dyletswyddau a chyfrifoldebau iechyd a diogelwch sy'n briodol i'r swydd.
• Ymrwymiad i Bolisi Cyfle Cyfartal ac Amrywiaeth Cyfoeth Naturiol Cymru, ynghyd â dealltwriaeth o sut mae’n gweithredu o fewn cyfrifoldebau’r swydd.
• Bod yn ymrwymedig i'ch datblygiad eich hun drwy ddefnydd effeithiol o'ch cynllun datblygu personol (a elwir yn 'Sgwrs' yn CNC).
• Unrhyw ddyletswyddau rhesymol eraill y gofynnir amdanynt sy'n gymesur â gradd y rôl hon.

Eich cymwysterau, profiad, gwybodaeth a sgiliau

1. Profiad o weithio fel cyfieithydd.
2. Gwybodaeth weithredol o Microsoft Office a meddalwedd cof cyfieithu.
3. Y gallu i ddatblygu a chynnal perthnasoedd gwaith effeithiol.
4. Aelodaeth lawn o Gymdeithas Cyfieithwyr Cymru, neu barodrwydd i weithio tuag at aelodaeth lawn.
5. Sgiliau rhyngbersonol da, yn ysgrifenedig ac ar lafar.
6. Ymwybyddiaeth o Safonau'r Gymraeg a pholisïau cysylltiedig sy’n ymwneud â’r Gymraeg.
7. Y gallu i wneud penderfyniadau o ran y defnydd o’r Gymraeg.

Gofynion y Gymraeg

    Hanfodol: C2 - Lefel hyfedredd uwch

Buddion

Bydd y rôl hon yn cynnig amrywiaeth o fanteision, gan gynnwys:

• cynllun Pensiwn y Gwasanaeth Sifil sy’n cynnig cyfraniadau o 28.97% gan y cyflogwr (bydd staff mewnol llwyddiannus yn aros yn eu cynllun pensiwn presennol)
• 28 diwrnod o wyliau blynyddol, yn codi i 33 diwrnod
• absenoldebau hael ar gyfer eich holl anghenion mewn bywyd
• ymrwymiad i ddatblygiad proffesiynol
• manteision a chymorth o ran iechyd a lles
• awr les wythnosol y gallwch ddewis pryd i’w defnyddio